Сёння ў Доме прэсы адбылася прэс-канферэнцыя, прысвечаная мадэрнізацыі і развіццю тэлефонных сетак у Беларусі, магчымасці прадастаўлення доступу да сеткі Інтэрнэт, у тым ліку ў малых населеных пунктах краіны.

Першы намеснік Міністра сувязі і інфарматызацыі Павел Ткач і намеснік генеральнага дырэктара па камерцыйных пытаннях РУП «Белтэлекам» Сяргей Туромша распавялі журналістам аб развіцці сучасных тэхналогій і маштабнай мадэрнізацыі сетак электрасувязі.

Яшчэ 25 гадоў таму хатні тэлефон для многіх, асабліва ў сельскай мясцовасці, лічыўся раскошай. Існавала чарга на ўстаноўку тэлефона. Аднак за мінулыя гады шмат змянілася: тэхналогіі, перавагі людзей. «Засталася нязменнай пазіцыя дзяржавы, якую паспяхова рэалізуе нацыянальны аператар, - забеспячэнне якаснай сувяззю насельніцтва на ўсёй тэрыторыі краіны. З пункту гледжання тэхналогій, мы змянілі некалькі пакаленняў. Усё гэта абумоўлена жаданнем спажыўца мець не толькі галасавую сувязь, але і высакахуткасны доступ у інтэрнэт, а таксама лічбавае шматканальнае тэлебачанне», - адзначыў Павел Ткач.

У апошнія гады праводзілася мадэрнізацыя гарадскіх і сельскіх тэлефонных сетак. Ажыццяўлялася замена аўтаматычных тэлефонных станцый каардынатнага і электроннага тыпаў на вузлы доступу да сеткі перадачы дадзеных з пераключэннем абанентаў на мультысэрвісную IMS-платформу. За гэты перыяд цалкам выведзены з эксплуатацыі АТС каардынатнага тыпу. Агульная колькасць абанентаў мультысэрвіснай IMS-платформы дасягнула 3,57 млн.

Абаненцкая база стацыянарнай тэлефоннай сувязі складае  4,45 млн. (пранікненне - 47,4 абанента на 100 жыхароў).

Як адзначыў першы намеснік Міністра сувязі і інфарматызацыі Павел Ткач, значныя інвестыцыі ўкладваліся ў будаўніцтва валаконна-аптычных ліній сувязі па тэхналогіі GPON. У 2016-2020 гг. пабудавана каля 33 тыс. км валаконна-аптычных ліній сувязі. У цяперашні час колькасць абанентаў, падключаных па тэхналогіі GPON, перавысіла 2,7 млн.

Актыўна развіваюцца сеткі сотавай рухомай электрасувязі. Ахоп насельніцтва паслугамі сотавай сувязі другога і трэцяга пакаленняў складае 99,9%, чацвёртага - 89,4%. Ахоп тэрыторыі паслугамі сотавай рухомай электрасувязі: 2G - 98,7%;       3G - 98,4%; LTE - 30,6%.

Намеснік генеральнага дырэктара па камерцыйных пытаннях РУП «Белтэлекам» Сяргей Туромша распавёў аб развіцці кампаніі і яе задачах ва ўмовах лічбавай трансфармацыі. У прыватнасці, «Белтэлекам» з'яўляецца адказным выканаўцам па асобных мерапрыемствам Дзяржаўнай праграмы развіцця лічбавай эканомікі і інфармацыйнага грамадства на 2016-2020 гады. Паспяхова рэалізуюцца такія праекты, як мадэрнізацыя мясцовых сетак электрасувязі, будаўніцтва валаконна-аптычных ліній сувязі і ўкараненне тэхналогіі пасіўных аптычных сетак, будаўніцтва сеткі перадачы даных па тэхналогіі Wi-Fi і інш.

Новы этап развіцця РУП «Белтэлекам» звязаны з укараненнем тэхналогіі абаненцкага доступу GPON. Перавагі сучаснай сеткі - гэта, у першую чаргу, якасць паслуг. Калі на меднай лініі хуткасць доступу ў Інтэрнэт, як правіла, не перавышала      10 Мбіт/с, то на оптавалаконнай абаненты могуць атрымаць да 200 Мбіт/с.

У 2019 годзе завершана праца па будаўніцтве ВОЛС ва ўсёй шматкватэрнай гарадской жылой забудове. У наступны перыяд асноўныя намаганні будуць накіраваны на будаўніцтва валаконна-аптычнай размеркавальнай сеткі ў кварталах індывідуальнай забудовы, перш за ўсё ў абласных цэнтрах і гарадах эканамічнага росту колькасцю больш за             80 тыс. жыхароў.

У цяперашні час оптавалакном забяспечаны 98% населеных пунктаў з лікам хатніх гаспадарак сто і больш, у хуткім часе праца будзе скончана. Валаконна-аптычнымі лініямі сувязі таксама забяспечана звыш 50% населеных пунктаў з лікам хатніх гаспадарак ад 50 да 100.

Сяргей Туромша таксама адзначыў, што сёння абанентам «Белтэлекама» даступныя больш за 70 сучасных тэлекамунікацыйных паслуг. У ліку запатрабаваных рашэнняў - высакахуткасны доступ у інтэрнэт, пакеты паслуг, відэакантроль, тэлебачанне, «Разумны дом», прадастаўленне ў карыстанне сеткі Wi-Fi, СМС-рассылкі, відэаканферэнцыі і інш.

Гаворачы аб далейшых кірунках працы, Павел Ткач адзначыў, што сёння ступень развіцця паслуг доступу ў сетку Інтэрнэт з'яўляецца важным паказчыкам эканамічнага развіцця рэгіёнаў і дзяржаў і адначасова рухаючай сілай іх ўстойлівага эканамічнага росту. Паслугі стацыянарнага і бесправаднога шырокапалоснага доступу ў сетку Інтэрнэт даюць імпульс развіццю бізнесу, з'яўляюцца асновай функцыянавання дзяржаўных інфармацыйных сістэм і сістэмы дзяржаўнага кіравання. «Асноўны акцэнт мы робім на паскораным развіцці тэхналогій бесправаднога шырокапалоснага доступу ў мэтах забеспячэння максімальнага ахопу насельніцтва і тэрыторыі сучаснымі паслугамі сувязі, ліквідацыі «лічбавай няроўнасці»,  - падсумаваў першы намеснік Міністра сувязі і інфарматызацыі.

У заключэнне спікеры адказалі на пытанні журналістаў. Наколькі павялічылася спажыванне інтэрнэт-трафіку насельніцтвам падчас пандэміі? Што такое разумны дом?    Як можна сачыць у восеньска-зімовы перыяд за тым, што адбываецца на дачы праз Інтэрнэт? Колькі каштуе гэтая паслуга і калі зменяцца тарыфы для званка ў роўмінгу?

Падрабязнасці ў відэазапісы прэс-канферэнцыі на YouTube-канале РУП «Дом прэсы».