5 сакавіка ў сталічным кінатэатры «Масква» прайшло ўрачыстае мерапрыемства, прысвечанае Дню жанчын. Святочная сустрэча аб’яднала цудоўных прадстаўніц кампаніі «Белтэлекам» і іншых арганізацый сувязі з усёй краіны. Арганізатары – Міністэрства сувязі і інфарматызацыі і галіновы прафсаюз – падрыхтавалі праграму, поўную цяпла, натхнення і сюрпрызаў.

З прывітаннем да ўдзельніц звярнуўся міністр сувязі і інфарматызацыі Кірыл Залескі. Кіраўнік ведамства падкрэсліў асаблівую ролю і неацэнны ўклад жанчын у стабільнае развіццё галіны. «Мы працягнем актыўную працу па ўсіх кірунках, ад якіх залежыць наш дабрабыт», – адзначыў міністр і адрасаваў прысутным самыя шчырыя пажаданні.

Цёплыя словы прагучалі таксама ад намесніка міністра сувязі і інфарматызацыі Юліі Шапкінай, старшыні галіновага прафсаюза Аляксандра Якаўлева і кіраўнікоў прадпрыемстваў. Ад імя мужчынскай паловы калектыву РУП «Белтэлекам» прысутных павіншаваў першы намеснік генеральнага дырэктара Генадзь Мельнікаў.

За добрасумленную працу, актыўны ўдзел у дзейнасці першасных прафсаюзных арганізацый і ў сувязі з Днём жанчын лепшыя з лепшых былі адзначаны ўзнагародамі Беларускага прафесійнага саюза работнікаў сувязі. Ганаровыя граматы і Падзякі сталі заслужаным прызнаннем іх высокага майстэрства і актыўнай жыццёвай пазіцыі.

Вясновае свята падарыла ўсім удзельніцам незабыўныя ўражанні і выдатны настрой.

Мы з радасцю далучаемся да ўсіх віншаванняў! Няхай гэтая вясна прынясе натхненне, мора ўсмешак і яркія прафесійныя поспехі!

З надыходзячым святам, з 8 Сакавіка!