У Мінску стартаваў фінал карпаратыўнага конкурсу прафмайстэрства «Лепшая каманда электрасувязі-2025». Рэспубліканскі этап аб'яднаў больш за 50 удзельнікаў з усёй краіны, якія на працягу трох дзён, з 8 па 10 кастрычніка, будуць змагацца за ганаровае званне мацнейшых у прафесіі.
У кожнай з сямі каманд – лепшыя тэхнічныя спецыялісты філіялаў, якія ўжо даказалі сваё майстэрства і перамаглі на абласных этапах конкурсу. Фінал – гэта не проста спаборніцтва, а маштабная пляцоўка для абмену вопытам, павышэння кампетэнцый і ўкаранення лепшых практык, ад чаго наўпрост залежаць якасць і надзейнасць усіх паслуг сувязі.
На ўрачыстым адкрыцці мерапрыемства намеснік генеральнага дырэктара па тэхнічных пытаннях РУП «Белтэлекам» Андрэй Жаркевіч падкрэсліў: «Усе ўдзельнікі ўжо паказалі свой найвышэйшы ўзровень, стаўшы лепшымі ў рэгіёнах. Сёння вам трэба будзе прадэманстраваць не толькі прафесійнае майстэрства, але і сапраўдны камандны дух. Вашы веды, энергія і гатоўнасць да інавацый – гэта аснова для развіцця сучасных лічбавых рашэнняў у нашай кампаніі. Жадаю кожнаму з вас сумленнай барацьбы, упэўненасці ў сваіх сілах і, вядома, перамогі! Няхай гэтыя тры дні стануць для вас імпульсам для далейшага росту».
Словы падтрымкі і пажаданні поспехаў канкурсантам таксама адрасаваў намеснік дырэктара па тэхнічных пытаннях філіяла «МГТС» Юрый Шпак.
На працягу трох дзён удзельнікі павінны пацвердзіць свае навыкі і веды па ключавых напрамках работы. Праграма пачнецца з тэарэтычных тэстаў. Затым – самы адказны этап, практычны, дзе каманды будуць будаваць умоўную валаконна-аптычную лінію сувязі (ВАЛС) і лакальную сетку, знаходзіць і ўстараняць пашкоджанні на кабелі ўмоўнай ВАЛС. На выкананне чатырох комплексных заданняў адводзіцца 5 гадзін 30 хвілін, што патрабуе не толькі вопыту, але і ўмення працаваць у камандзе, размяркоўваць задачы і галоўнае – паказваць максімальны вынік.
Конкурсы прафмайстэрства – важная частка карпаратыўнай культуры «Белтэлекама». Такія мерапрыемствы становяцца стымулам для бесперапыннага развіцця супрацоўнікаў і садзейнічаюць укараненню лепшых практык.
Перад пачаткам конкурсных іспытаў удзельнікі ўшанавалі памяць Герояў Вялікай Айчыннай вайны, усклаўшы кветкі да Вечнага агню на плошчы Перамогі, і наведалі музей гісторыі Вялікай Айчыннай вайны.
Пераможцы і прызёры рэспубліканскага этапа конкурсу «Лепшая каманда электрасувязі-2025» стануць вядомы 10 кастрычніка.
Сачыце за навінамі з конкурсу ў нашым Тэлеграм-канале, каб першымі пазнаць імёны наймацнейшых адмыслоўцаў!
